رونو طنجة: ملي “المؤشرات كتبان كلها وردية ” والعمال كياكلوا الدق!
تبشرنا مصانع رونو طنجة بلي 850 عامل غادي يلقاو راسهم فالزنقة ابتداء من فاتح أبريل 2026.
علاش؟ قالك سيدي “ترشيد النفقات”. الغريب فالموضوع هو أن هاد الشركة يلاه دارت مؤتمر صحفي فـ 27 يناير، وقالت بلي كاع الأرقام عندها “وردية” ومنتعشة، ولكن واخا هكاك قررت تضحي بـ 15% من الخدامة (800 عامل و50 كادر) باش تطلع “الإنتاجية” بنفس العدد ديال الطوموبيلات، و لكن بعدد قليل من اليد العاملة.
رونو “تالفة ليها الجرية” والضحية هو العامل المغربي
المصنعين ديال الطوموبيلات فـ أوروبا كاملين شادهم الدَوخة: واحلين بين المنافسة الشرسة ديال الصين، وبين التهديدات ديال ترامب والضرائب ديالو، وزيد عليها التخبط ديال الاتحاد الأوروبي اللي مرة يقول “الكربون خايب” ومرة يقول ” الكاربون زوين”. وأول وحدين كيخلصوا ثمن هاد “التلف والمشاكل” هما مئات العمال المغاربة اللي غادي يتسرحوا هاد الربيع، بلا ما نهضرو على الشركات المناولة (نظافة، طبخ، بستنة…الى اخ) اللي حتى هي غادي تنقص من الخدامة ديالها، رغم أن
رونو خذات 300 هكتار من أحسن أراضي طنجة مقابل وعد بتشغيل هاد الناس.
كذبة الـ 7500 منصب شغل جديد
هاد الخبار ديال “التسريحات” كضرب فـ الزيرو ديال الاتفاقية اللي سنا عزيز أخنوش ( اتفاقيات شراكة) مع رونو فـ أكتوبر 2025، واللي كانت كتهضر بوجه قاصح على خلق 7500 منصب شغل جديد فـ القريب العاجل! العمال فـ طنجة ملي سمعوا هاد الخبر بزاف منهم استهزء ماشي فقط عارفينها باش مسقية، و لكن 7500 هو نيت العدد الإجمالي ديال الخدامة اللي كاينين دابا. يعني بحال إلا بغاو يقنعونا بلي رونو، وهي فهاد الأزمة، غادي توظف فـ 3 سنين المقبلة قد داكشي اللي وظفات فـ 15 عام! هادا كيتسمى “الضحك على الذقون” على عينك ابن عدي.
علاش طنجة بالضبط؟
رونو شافت “الحيط المائل” وجات ليه. فـ رومانيا كاين قانون أوروبي قاصح، وفـ تركيا كاينين نقابات ودولة واقفة على شغلها. حنا هنا، رونو كتدير ما بغات، وضحات بـ “المغاربة الحنان” اللي ديما هما الحلقة الأضعف.
الدلال اللي عطاه المغرب لرونو:
المغرب عطى لرونو كاع داكشي اللي حلمت بيه باش غير تقبل تجي عندنا:
- فـ 2009: صندوق الإيداع والتدبير (CDG) دخل معاهم بـ 47% من الرأسمال غير باش يوفر ليهم “السيولة” فـ وقت الأزمة العالمية، وخرج بـ “نفس الثمن” فـ 2014 بلا ما يربح حتى ريال.
- الروبوتات والمساعدات: كلما دخلات رونو شي “روبوت” جديد للمصنع (Automation)، الدولة كتعطيها مساعدة ديال 20% من قيمة الصفقة مقابل وعود بخلق فرص شغل. والنتيجة؟ “المكننة” طلعت من 7% لـ 43%، والخدامة نقصوا من 8900 فـ 2021 لـ 7500 فـ 2025.
فين هو رئيس الحكومة؟
المكتب النقابي (UMT) خرج بيان فـ 23 يناير كيحذر من هاد الكارثة، ولكن حتى دابا باقي ماشفنا حتى تحرك رسمي من عزيز أخنوش اللي وعدنا بـ “مليون منصب شغل”، ولا من الوزير مزور اللي فرحان غير بـ “التمويلات المبتكرة” وبتطبيق أوامر صندوق النقد الدولي حرفيا.
اريناس
