اتصالات المغرب حققت 36.7 مليار درهم رقم معاملات خلال سنة 2025

علنات مجموعة “اتصالات المغرب” على النتائج المالية ديالها لسنة 2025، وبان بلي الشركة مازال غادة فـ خط تصاعدي وخا المنافسة . هاد العام، رقم المعاملات الاجمالي ديال المجموعة وصل لـ 36,7 مليار درهم، بزيادة ديال 1,4% مقارنة مع العام اللي فات، وهو أداء كيبين بلي الشركة قادرة تتمشى مع المتغيرات ديال السوق سواء فـ المغرب ولا خارج المغرب.

السبب الرئيسي لهاد النمو كيرجع بالأساس للفروع ديال الشركة فـ أفريقيا (موف أفريكا) اللي حققات قفزة نوعية بـ 5,3%، فـ الوقت اللي بقات فيه الأنشطة فـ المغرب صامدة بزيادة خفيفة وصلات لـ 0,4%. هاد العام كان حاسم بالنسبة للمجموعة، حيت قررات تحط استثمارات ضخمة وصلات لـ 3 مليار درهم، الهدف منها هو إطلاق تقنية الجيل الخامس (5G) فـ المغرب وتجديد الرخص الدولية، بلا ما نساو التركيز الكبير على توسيع شبكة الألياف البصرية (FTTH).

وخا هاد المصاريف الصحيحة فـ البنية التحتية خلات “الكاش” (التدفقات النقدية) ينقص بـ 11% باش يستقر فـ حدود 8,02 مليار درهم، إلا أن الوضعية المالية ديال الشركة بقات “صحيحة” ومتحكم فيها، حيت الديون ديالها بقات فـ مستويات معقولة بزاف مقارنة بالأرباح.

وبناءً على هاد النفس الطويل، قرر مجلس الإدارة يفرح المساهمين واقترح يوزع أرباح بقيمة 4 دراهم للسهم الواحد، شي اللي كيعني توزيع مجموع ديال 3,5 مليار درهم كأرباح صافية